Miklir skógareldar loga nú á nokkrum stöðum í Svíþjóð og hefur gengið illa að ráða niðurlögum þeirra enda er gróður skraufaþurr eftir mikla þurrka. Í gærkvöldi voru íbúar í Ängra og Ljusdals sveitarfélaginu í Gävleborgsléni hvattir til að yfirgefa heimili sín og koma sér á brott þar sem eldar stefndu á byggðina.

Slökkviliðsmenn hafa barist þrotlaust við eldana og fengu í nótt fullan gám af slöngum frá almannavörnum og fá tvo slíka gáma til viðbótar í dag. Slökkviliðsmennirnir eru bjartsýnir á að þeim muni takast að bjarga íbúðarhúsum frá eldinum en segja að slökkvistarfið muni taka marga daga til viðbótar.

Þyrlur frá Noregi verða sendar til Svíþjóðar í dag til að taka þátt í slökkvistarfinu. Alls verða sex norskar þyrlur sendar af stað nú í morgunsárið og verða tvær sendar til Älvdalen í Dalarna, tvær til Bollnäs og tvær til Örebro.