Leikurinn var settur í loftið í september á síðasta ári og síðan hafa 125 milljónir skráð sig sem notendur hans að sögn Epic Games sem bjó leikinn til. Að baki þessum glæsta árangri eru eflaust margar ástæður en kannski er aðalástæðan sú að í leiknum blandast saman margar tegundir ólíkra tölvuleikja. Leikurinn er í stuttu máli sagt samblanda af byggingarleik á borð við Minecraft og skotleik á borð við Counter Strike.
Vinsælasti hluti spilsins snýst um að 100 leikmenn berjast sín á milli þar til aðeins 1 stendur eftir uppi á eyðieyju.
Leikmenn geta keypt sér ýmislegt í leiknum en úrvalið í versluninni er síbreytilegt og ef fólk kaupir ekki hlutina um leið og það sér þá getur svo farið að það missi af þeim því þeir geta verið horfnir næsta dag. Þetta getur vakið upp tilfinningu hjá fólki að það verði að skoða hvað er í boði daglega til að missa ekki af einhverju.
Einnig er í boði að kaupa svokallaða „battle pass“ til að fá aðgang að verkefnum sem hjálpa leikmanninum til að fá hluti sem eru eftirsóttir í leiknum. Þeir sem kaupa „battle pass“ neyðast eiginlega til að spila mikið til að fá eitthvað fyrir peningana sína. Leikmenn geta ekki keypt neitt í leiknum sem veitir þeim forskot fram yfir aðra eða hjálpar þeim að vinna.
Þrátt fyrir að leikurinn sé ókeypis þá var velta hans í maí sem svarar til rúmlega 30 milljarða íslenskra króna. Þessir peningar koma aðeins frá sölu á „battle pas“ og öðru í leiknum.