Þetta sagði Erik Olof Jansåker, lögreglustjóri, á fréttamannafundi í gær. Hann sagði að rannsóknir á „venjulegum“ afbrotum verði einfaldlega að bíða svo lögreglan geti almennilega tekist á við þau alvarlegu afbrot sem skotárásirnar eru, ástandið sé óheyrilega slæmt.
Fréttamannafundurinn var haldinn í kjölfar morðs á ungum manni í Rosengård hverfinu á mánudaginn en hann var skotinn til bana á götu úti. 19 skotárásir hafa verið gerðar í Malmö það sem af er ári og hafa 10 látist í þeim. Jansåker sagði þetta sýna vel hversu alvarleg staðan er og hversu mikill óróleiki er meðal forhertustu afbrotamannanna.
Hann reyndi þó að róa almenning og sagði að lögreglan í Malmö teldi sig geta tekist á við þessa forhertu afbrotamenn. Hann sagði einnig að „þagnarmenningin“ meðal afbrotamanna geri lögreglunni erfitt fyrir við rannsóknir mála.
„Það eru um 200 manns sem standa á bak við þessi grófu afbrot og við teljum okkur hafa stjórn á þeim en það er erfitt að skera úr um hvaða ástæður liggja að baki skotárásunum hverju sinni.“