Um klukkan 18 í gær ætluðu lögreglumenn að stöðva akstur ökumanns í Langarima en hann var ekki á þeim buxunum að ræða við lögreglumenn og jók hraðann. Hófst þá eftirför sem lauk skömmu síðar í Fannafold og var ökumaðurinn þá handtekinn.

Ökumaðurinn er grunaður um að hafa verið undir áhrifum fíkniefna, að fara ekki að fyrirmælum lögreglu, of hraðan akstur, akstur án ökuréttinda og brot á vopnalögum.

Þrír ökumenn til viðbótar voru handteknir síðdegis í gær og gærkvöldi en þeir eru allir grunaðir um akstur undir áhrifum fíkniefna. Einn þeirra er grunaður um að hafa ekið sviptur ökuréttindum, að hafa verið með fíkniefni í fórum sínum og brot á lyfjalögum. Annar er grunaður um að hafa verið með fíkniefni í fórum sínum, brot á lyfjalögum og brot á vopnalögum. Farþegi í bifreið hans er grunaður um vörslu fíkniefna.

Einn ökumaður var handtekinn í gærkvöldi grunaður um ölvun við akstur.