Rannsóknarnefnd sem rannsakað hefur hvarf malasísku farþegaþotunnar sem hvarf í mars 2014 hefur skilað 400 blaðsíðna skýrslu um hvarfið. Um er að ræða eitt dularfyllsta hvarf flugsögunnar en lítið sem ekkert hefur spurst til vélarinnar, MH370 frá Malaysia Airlines, sem hvarf þegar hún var á leið frá Kuala Lumpur í Malasíu til Peking í Kína.
Í skýrslunni ber það helst til tíðinda að rannsakendur geta ekki útilokað að vélinni hafi verið rænt. Henni hafi verið vísvitandi beint af leið og ekki hafi verið um einhverskonar vélarbilun að ræða.
Ættingjar þeirra 239 sem voru um borð í vélinni eru sagðir ósáttir við efni skýrslunnar og þá ekki síst þá staðreynd að litlar sem engar nýjar upplýsingar koma fram í skýrslunni. Skýrsluhöfundar draga ekki stórar ályktanir í skýrslunni og segjast í raun ekki geta fullyrt neitt um afdrif vélarinnar.
Í samtölum við fjölmiðla um efni skýrslunnar sögðu aðstandendur að í skýrslunni hafi verið bent á ýmis atriði sem betur mættu fara, vinnureglum hafi ekki veri fylgt og einhver mistök gerð en ekki sé að finna neitt um orsakir þess að vélin hvarf.
Kok Soo Chon, yfirmaður rannsóknarinnar, sagði að skýrsluhöfundar hefðu komist að því að vélinni hefði verið stýrt af leið af mannavöldum. „Þar af leiðandi getum við ekki útilokað að þriðji aðili hafi átt aðkomu að hvarfinu,“ sagði hann og bætti við að frekari svör yrði ekki hægt að fá fyrr en flak vélarinnar finnst.
Aðstandendur þeirra sem voru í vélinni voru margir hverjir mjög ósáttir við efni skýrslunnar og eru margir sagðir hafa gengið út þegar hún var kynnt. „Ég er mjög vonsvikin. Ég er reið. Það er ekkert nýtt í þessari skýrslu,“ sagði Maizura Othman en eiginmaður hennnar var flugþjónn um borð í vélinni.