K-Supermarket í Helsinki í Finnlandi ætlar að bjóða viðskiptavinum sínum að gista í versluninni í nótt til að þeir geti kælt sig í hitanum en mjög heitt er í veðri í Finnlandi eins og víðar í Evrópu. Góð loftkæling er í versluninni og vonast forsvarsmenn hennar til að fólk geti nýtt sér það til að gera sér lífið aðeins bærilegra í hitanum.

Helsingin Sanomat hefur eftir Marika Lindfors, verslunarstjóra, að hugmyndin hafi í raun komið frá viðskiptavini sem hafi í hálfgerðu gríni sagt við hana „að það væri frábært að geta sofið í svölum stórmarkaði“. Þeim sem gista verður boðið upp á kvöldmat og morgunmat.

Finnsk heimili eru að jafnaði vel í stakk búin til að takast á við mikla kulda en færri eru með loftkælingar til að takast á við mikla hita.