Brúðkaupsveislan, gestirnir, brúðhjónin og fyrsti kossinn sem hjón. Þetta er eitthvað sem flest pör vilja láta mynda þegar þau ganga í hjónaband. En það er öllu sjaldgæfara að fólk vilji láta mynda það sem fram fer bak við luktar dyr (í flestum tilfellum) á brúðkaupsnóttina sjálfa. Nú leitar fólk, sem ætlar að ganga í hjónaband í september, að ljósmyndara sem er reiðubúinn til smá næturvinnu við að taka upp það sem fram fer á brúðkaupsnóttina. Sem sagt taka upp kynlífsmyndband.

Það er breskt par sem leitar að ljósmyndara í verkefnið. Þau hafa auglýst eftir ljósmyndara á breskri atvinnuauglýsingasíðu og bjóða sem nemur um 400.000 íslenskum krónum í laun fyrir verkið en upptökur eiga að fara fram frá klukkan 1 til 3.

New York Post skýrir frá þessu.

„Bæði ég og unnusti minn teljum að brúðkaupsdagurinn eigi ekki bara að snúast um daginn, nóttin er jafn mikilvæg. Frá því að við trúlofuðumst höfum við verið sammála um að við viljum fá einhvern til að mynda brúðkaupsnóttina. Því miður höfum við ekki fundið neinn sem er tilbúinn til þess eða sem við teljum að okkur líði vel nærri.“

Segir í auglýsingunni. Einnig fylgir nákvæm lýsing með á hvað á að mynda og að upptakan verði aðeins fyrir nýgiftu hjónin.