Hópur vísindamanna við Háskólann í Southampton á Englandi telur að allt að 30 metra háar öldur geti myndast á þessu svæði og grandað skipum. Í tengslum við heimildarmynd Channel 5 sjónvarpsstöðvarinnar „The Bermuda Triangle Enigma“ bjuggu vísindamennirnir til líkan af USS Cyclops sem var risastórt skip sem hvarf með manni og mús í Bermúdaþríhyrningnum 1918. 309 manns fórust með skipinu en þetta er mesta manntjón sem bandaríski sjóherinn hefur orðið fyrir þar sem átöku grönduðu ekki skipi. Skipið var 165 metra langt og var notað við kolaflutninga til bandarískra herskipa. Ekkert brak fannst úr skipinu né lík.
Sumir telja að þar sem ekkert neyðarkall barst frá skipinu hafi yfirskilvitlegir atburðir komið við sögu þegar það hvarf. En ensku vísindamennirnir eru öllu jarðbundnari og segja að á svæðinu, sem er kallað Bermúdaþríhyrningurinn, mætist stundum þrír öflugir stormar sem koma úr ólíkum áttum. Þegar þeir mætast myndast risastórar öldur, allt að 30 metra háar. Þetta séu mjög brattar öldur sem geti auðveldlega klippt skip í tvennt. Vísindamennirnir telja að öldur sem þessar eigi hlut að máli í dularfullum skipshvörfum á svæðinu og þar á meðal þegar USS Cyclops hvarf.
En ekki er víst að allir fallist á þessa kenningu enda skýrir hún ekki dularfull flugvélahvörf á svæðinu. Það má því telja líklegt að samsæriskenningasmiðir haldi áfram að velta vöngum yfir Bermúdaþríhyrningnum og því sem þar hefur gerst.
