Tveir ökumenn voru sviptir ökuréttinum í gærkvöldi og nótt eftir að hafa verið staðnir að ofsaakstri. Sá fyrri var sviptur ökuréttindum eftir að bifreiðin sem hann ók mældist á 157 km/klst á Suðurlandsvegi við Sandskeið en leyfður hámarkshraði þar er 90 km/klst. Hinn ökumaðurinn, sem er aðeins 17 ára, ók bifreið á 126 km/klst á Gullinbrú á fyrsta tímanum í nótt en leyfður hámarkshraði þar er 60 km/klst. Ökumaðurinn var sviptur ökuréttindum og móðir hans kom á lögreglustöðina og sótti hann. Barnaverndaryfirvöldum verður tilkynnt um málið.

Á ellefta tímanum í gærkvöldi voru tveir ungir menn handteknir við Holtaveg en þeir eru grunaðir um húsbrot. Þeir voru vistaðir í fangageymslu á meðan rannsókn og skýrslutökur stóðu yfir. Annar hinna handteknu er aðeins 17 ára og var móðir hans viðstödd yfirheyrslur yfir honum. Barnaverndaryfirvöldum verður tilkynnt um málið.

Fjórir ökumenn voru handteknir í nótt grunaðir um akstur undir áhrifum fíkniefna. Tveir þeirra eru einnig grunaðir um að hafa verið undir áhrifum áfengis. Tveir reyndust vera sviptir ökuréttindum og var þetta ekki í fyrsta sinn sem þeir voru stöðvaðir réttindalausir við akstur. Einn þeirra ók bifreið sem var án skráningarnúmera.

Afskipti voru höfð af fimm mönnum í gærkvöldi vegna fíkniefnamála. Einn þeirra er grunaður um vörslu fíkniefna og annar um vörslu, sölu og dreifingu fíkniefna.