Fjögur slysanna áttu sér stað í Magaluf en þangað koma mörg þúsund ungmenni frá Norðurlöndunum og Bretlandi hvert sumar til að skemmta sér. Það hefur vakið mikla athygli að þrjú slysanna þar áttu sér stað í sömu byggingunni, Eden Roc Apartments, en þau eru öll ótengd.
Í apríl hrapaði 19 ára skosk stúlka til bana úr byggingunni, í júní var það tvítugur írskur maður og í júlí var það 18 ára breskur piltur.
Eden Roc Apartments er ekki hótel og íbúðir þar eru að sögn ekki leigðar út til ferðamanna. Þau sem hröpuðu til bana úr byggingunni dvöldu ekki þar. Dagbladet hefur eftir eiganda byggingarinnar að spænsk yfirvöld verði að axla sína ábyrgð í málunum þar sem ljóst sé að áfengisneysla og í sumum tilfellum fíkniefnaneysla kom við sögu í málunum. Það sé hlutverk yfirvalda að koma í veg fyrir að ungt fólk sé ofurölvi á ferð um miðjar nætur.
Borgarstjórnin í Calvia hélt sérstakan fund um málin í byrjun júlí þar sem farið var yfir fyrirliggjandi upplýsingar um málin og lausna var leitað. Borgarstjórinn sagði að fundi loknum að áfram yrði haldið með upplýsingaherferði í samstarfi við breska sendiráðið og einnig verði að reyna að takmarka framboð áfengis þar sem áfengi hafi komið við sögu í öllum málunum.
El Mundo segir að fyrir nokkrum árum hafi það verið stórt vandamál að ungir ferðamenn reyndu að hoppa frá svölum út í sundlaugar, þetta var svo mikið stundað að það fékk sitt eigið nafn: „Balconing“. Lögreglan brást við þessu með því að banna klifur á svölum og voru sektir lagðar við brotum á banninu, allt að 1.500 evrur fyrir hvert brot.
Slysin á þessu ári hafa þó ekki komið til við þessa hættulegu iðju heldur aðra hættulega iðju en þau eru mörg sögð hafa orðið þegar unga fólkið var að klifra á milli svala.