Síðdegis í gær var ökumaður handtekinn við Logafold í Grafarvogi en hann hafði ekið á göngustígum og spólað upp gróðri. Ökumaðurinn er grunaður um að hafa verið undir áhrifum fíkniefna og án tilskilinna ökuréttinda.
Um klukkan eitt í nótt var maður handtekinn í Hafnarfirði en hann er grunaður um húsbrot. Hann var vistaður í fangageymslu.
Fjórir ökumenn voru handteknir í nótt grunaðir um akstur undir áhrifum fíkniefna. Einn þeirra er einnig grunaður um að hafa verið undir áhrifum áfengis og að hafa ekið sviptur ökuréttindum. Annar er einnig grunaður um brot á lyfjalögum og vörslu/sölu fíkniefna. Sá þriðji ók án þess að hafa öðlast ökuréttindi.
Einn ökumaður var handtekinn í nótt grunaður um ölvun við akstur.
Afskipti voru höfð af ökumanni í Mosfellsbæ í nótt en sá er grunaður um að hafa verið að aka fólki gegn gjaldi án þess að hafa tilskilin leyfi til þess.
Á sjöunda tímanum í gærkvöldi var ökumaður kærður fyrir of hraðan akstur á Vesturlandsvegi en bifreið hans mældist á 132 km/klst þar sem leyfður hámarkshraði er 80 km/klst. Um hálfri klukkustund síðar var annar ökumaður kærður fyrir of hraðan akstur í Ártúnsbrekku en hraði bifreiðarinnar sem hann ók mældist 134 km/klst en leyfður hámarkshraði er 80 km/klst.