Klukkan 01.22 í nótt var tvítugur ökumaður sviptur ökuréttindum eftir að bifreiðin, sem hann ók, mældist á 148 km/klst á Sæbraut við Langholtsveg en þar er leyfður hámarkshraði 60 km/klst.
Á tíunda tímanum í gærkvöldi var ölvaður maður handtekinn í Austurstræti en hann er grunaður um hótanir og þjófnað. Maðurinn var vistaður í fangageymslu. Á svipuðum tíma var ofurölvi maður handtekinn við veitingahús í Hafnarfirði en hann var með almenn leiðindi og sló til gesta. Hann var vistaður í fangageymslu.
Á sjötta tímanum í gær datt hjólreiðamaður fram fyrir sig í Heiðmörk og hlaut áverka á öxl og baki.
Einn ökumaður var handtekinn í nótt grunaður um akstur undir áhrifum fíkniefna.