Pínulítil fluga gerði sér lítið fyrir á föstudaginn og eyðilagði heimsmetstilraun á örskotsstundu. Að öllum líkindum var þó ekki um ásetning að ræða af hálfu flugunnar.

Þetta gerðist í Nidda nærri Frankfurt í Þýskalandi. Þar stóð yfir hinn árlegi Dómínódagur. 22 manna þýskt lið var mætt til keppni meðal annarra. Markmið liðsins var að bæta eigið heimsmet frá 2013 og raða 596.229 litlum dómínókubbum upp og láta detta á endanum.

Þetta var mjög tímafrekt enda kubbarnir mjög litlir, á stærð við fingurnögl. Liðið hafði eytt tveimur vikum í að raða þeim upp þegar litla flugan mætti á svæðið og settist á einn kubbinn og velti honum og þar með voru dómínóáhrifin farin af stað. Liðið hafði þá ekki lokið við uppröðunina.

Ekki var tími til að raða kubbunum upp á nýjan leik og því stendur gamla heimsmetið enn en í því féllu 537.938 kubbar.