Á Facebooksíðu, sem að sögn BT er síða hans, hvetur hann fólk til að senda sér bréf í fangelsið. Þetta er ritað á ensku og var birt seint í gærkvöldi á síðunni. Hann skrifar að þeir sem vilja skrifast á við hann séu velkomnir til að senda honum bréf.
„Ég get hvorki sent tölvupóst né upplýsingar um Googleaðgang. Ég svara öllum sem skrifa mér.“
Segir Madsen í færslunni sem virðist vera skrifuð af millilið sem gengur undir heitinu Zagadka.
Á föstudaginn verður eitt ár liðið síðan Madsen myrti Wall um borð í kafbáti sínum UC3 Nautilus í Eyrarsundi. Hann drap hana og misþyrmdi kynferðislega áður en hann hlutaði líkið í sundur og henti því í sjóinn. En þrátt fyrir að hann hafi sett lóð á líkamshlutana til að sökkva þeim þá tókst lögreglunni með aðstoð sérþjálfaðra sænskra líkhunda að finna líkamshlutana.
Í apríl var Madsen dæmdur í lífstíðarfangelsið fyrir hryllingsverkið. Hann áfrýjaði þeim hluta dómsins sem snýr að refsiþyngdinni. Með því var einangrun hans aflétt í fangelsinu en dómurinn hafði ákveðið að hann skyldi sæta einangrun þar til málið hefði verið tekið fyrir hjá Landsrétti. Hann má því senda bréf og fá bréf og fá heimsóknir án þess að fangaverðir séu viðstaddir.