Sádi-Arabar hafa tekið gagnrýni Kanadamanna á mannréttindamál í landinu illa upp. Stjórnvöld í Sádi-Arabíu telja að Kanada hafa blandað sér í „innanríkismál“ þegar sendiherra Kanada í landinu lýsti yfir stuðningi við baráttufólk fyrir mannréttindum sem var nýlega handtekið í Sádi-Arabíu og hvatti til þess að það yrði látið laust.

Sádi-Arabar brugðust við þessum ummælum með því að reka sendiherrann úr landi og með því að kalla eigin sendiherra heim frá Kanada. Flugfélagið Saudia hættir einnig flugi til og frá Toronto í Kanada. Einnig verða mörg þúsund námsmenn kallaðir heim frá Kanada en þar dvelja þeir við nám á kostnað sádi-arabíska ríkisins. En Sádi-Arabar láta ekki þar við sitja því þeir hafa einnig tilkynnt að ekki verði gerðir frekari viðskiptasamningar við Kanada en óljóst er hvaða áhrif þetta hefur á núverandi samninga.

Chrystia Freeland, utanríkisráðherra Kanada, segir að Kanada muni ávallt berjast fyrir mannréttindum í Kanada sem og um heim allan og mannréttindum kvenna.