Vísindamenn við Arizona háskólann hafa komist að því að fólk er algengasta uppspretta baktería og sýkla og karlar slá konunum algjörlega út í þessum efnum. Bakteríufjöldi við skrifborð, síma, tölvur, lyklaborð, skúffur og persónulega hluti er sagður vera þrisvar til fjórum sinnum meiri hjá körlum en konum. Ýmsar kenningar hafa verið settar fram til að reyna að skýra þetta nánar og meðal þess sem hefur verið sett fram er að karlar séu oftar með stærri skrifborð og því sé meira borðrými til að koma hlutum fyrir á og því eigi bakteríur auðveldara með að fjölga sér enda nægt pláss. Önnur skýring er að karlar séu einfaldlega ekki eins snyrtilegir og konur.
Flestar bakteríur á mörgum vinnustöðum koma frá fólki enda engin furða. Lyklaborð og mýs eru stór hluti af skrifstofuvinnunni hjá mörgum. Eitt slag á lyklaborðið skilur eftir bakteríur og tekur aðrar upp.
Ekki má gleyma farsímum en rannsókn vísindamanna við Arizona háskóla sýndi að á farsímum eru að jafnaði 10 sinnum fleiri bakteríur en á klósettsetum. Það er kannski ekki þægileg tilhugsun þegar við höfum í huga að við berum símann upp að eyrum og munni nær daglega.
Í umfjöllun Independent kemur fram að rannsóknir hafi sýnt að allt að 90 prósent af kaffibollum í kaffistofum vinnustaða séu þaktir bakteríum og sýklum og að 20 prósent þeirra séu með saursýkla. Það er því kannski ekki úr vegi að vera bara með sinn eigin kaffibolla á skrifstofunni og sjá sjálf(ur) um þrif á honum.
