Miklir hitar í Danmörku síðan í byrjun maí hafa valdið ótímabærum dauða um 250 landsmanna. Það er sérstaklega fólk eldra en 65 ára sem hefur farið svona illa út úr hitanum. Þetta eru niðurstöður nýrrar greiningar Statens Serum Institut, stofnun sem má líkja við íslenska Landlæknisembættið.

Samkvæmt greiningunni hafa um 250 fleiri látist í sumar en reikna má með að látist að sumarlagi. Lasse Vestergaard, læknir hjá Statens Serum Institut, segir að hinir miklu hitar í Norður-Evrópu á undanförnum vikum hafi haft marktæk áhrif á heilsufar fólks og þá sérstaklega eldra fólks, kornabarna og þeirra sem eru veikir fyrir.

Af þessum sökum hvetur stofnunin fólk til að gæta þess að drekka nóg, innbyrða meira salt en að jafnaði og dvelja í skugga þegar sólin er sem sterkust.

Samkvæmt því sem fram kemur á vef stofnunarinnar þá er staðan álíka í Svíþjóð og Noregi en þar hafa einnig verið miklir hitar í sumar.