Skömmu eftir miðnætti í nótt var kvartað undan hávaða í heimahúsi í Kópavogi. Þegar lögreglumenn komu á vettvang var ekkert að heyra. Lögreglumenn ræddu við þann sem kvartað hafði verið undan og báðu um að vera ekki með hávaða á þessum tíma sólarhringsins. Skömmu síðar var þessi sami aðili kominn fram á stigagang og vildi leggja fram kvörtun vegna nágranna sinna. Hann reiddist mjög þegar lögreglumenn vildu ekki taka mark á kvörtuninni og sló til lögreglumanns.
Maðurinn var handtekinn og vistaður í fangageymslu og verður yfirheyrður í dag. Í íbúð hans fundust skotvopn, skotfæri og eggvopn og voru þessir munir haldlagðir.
