Á miðvikudaginn var ráðist á Peter Madsen í Storstrøm fangelsinu í Danmörku en þar afplánar hann lífstíðardóm fyrir morðið á sænsku fréttakonunni Kim Wall. Morðið vakti mikla athygli en það framdi Madsen um borð í kafbáti sínum Nautilius. Wall fór í siglingu með Madsen í kafbátnum að kvöldi 9. ágúst 2017 en kom ekki aftur í land á lífi. Madsen myrti hana aðfaranótt 10. ágúst um borð í kafbátnum. Hann misþyrmi líki hennar kynferðislega og hlutaði það síðan í sundur og varpaði í sjóinn.
Lögreglunni tókst að finna líkhlutana með aðstoð sérþjálfaðra sænskra hunda sem geta fundið lík í vötnum.
Ekstra Bladet skýrir frá því í dag að samfangi Madsen hafi ráðist á hann á miðvikudaginn í fangelsinu og veitt honum áverka í andlit. Lögreglan hefur staðfest að ráðist hafi verið á 47 ára fanga á miðvikudaginn og að 18 ára fangi hafi verið að verki. Lögreglan vill ekki skýra frá ástæðum árásarinnar.