Viktor og Amalija Knavs sóru í gær eið hjá alríkisdómara á Manhattan í New York og urðu í framhaldinu bandarískir ríkisborgarar. Það eru eflaust fæstir sem kannast við nöfn hjónanna eða vita hver þau eru en þau eru foreldrar Melania Trump eiginkonu Donald Trump forseta. Þau fengu ríkisborgararétt á grundvelli laga sem eru Trump mikill þyrnir í augum og hann vill afnema.

Hjónin fengu lögreglufylgd í dómshúsið og vakti koma þeirra að vonum mikla athygli. Fjöldi fréttamanna mætti á svæðið. Lögmaður hjónanna sagði fréttamönnum að allt hefði gengið vel og hjónin væru þakklát og ánægð með þennan góða dag.

Þau hafa búið í Bandaríkjunum í mörg ár og hafa oft sést í Washington þaðan sem þau hafa ferðast með forsetafjölskyldunni til golfvallar Trump í Flórída. Í febrúar var skýrt frá því að hjónin væru með græna kortið svokallaða en það veitir fólki rétt til að vinna og dvelja í Bandaríkjunum um óákveðinn tíma.

Ekki er vitað hvernig hjónin fengu græna kortið en hugsanlega hefur Melania eða einhver annar úr forsetafjölskyldunni aðstoðað þau við það og mælt með þeim en Trump hefur einmitt gagnrýnt lög sem gera fólki kleift að fá ættingja sína til landsins, svokallaður raðinnflutningur. CNN segir að megnið af grænu kortunum séu veitt á grunni fjölskyldutengsla.

Trump hefur krafist lagabreytinga þannig að aðeins hjón og börn undir 18 ára aldri fái að setjast að í Bandaríkjunum á grunni þess að þau eigi fjölskyldu þar fyrir. Þetta gæti að mati sérfræðinga fækkað innflytjendum um 40-50 prósent.