Niðurstöður nýrrar danskrar rannsóknar sýna að það að fá heilahristing eða verða fyrir heilaskaða eykur líkurnar á að viðkomandi fremji sjálfsvíg. Þeim mun alvarlegri sem heilahristingurinn og heilaskaðinn eru þeim mun meiri eru líkurnar á sjálfsvígi hjá viðkomandi. En smávegis heilahristingur eykur einnig líkurnar.

Það voru vísindamenn við Geðhjúkrunarmiðstöðina í Kaupmannahöfn sem framkvæmdu rannsóknina sem hefur verið birt í vísindaritinu Journal of the American Medical Association. Politiken skýrir frá þessu.

Haft er eftir Michael Eriksen Benros, aðalhöfundi rannsóknarinnar, að tengslin séu greinileg en hafi komið mjög á óvart. Tekið var tillit til annarra mikilvægra þátta, sem geta haft áhrif á niðurstöðurnar, í rannsókninni.

Fólk, sem verður fyrir alvarlegum höfuðáverkum og þarf að liggja á sjúkrahúsi, fremur nær tvöfalt oftar sjálfsvíg en þeir sem ekki verða fyrir höfuðáverkum. Ef áverkarnir eru alvarlegir og hægt er að sýna fram á heilaskaða með heilamyndatöku er hættan á að viðkomandi fremji sjálfsvíg 2,38 sinnum meiri en ella. Þetta þýðir að fyrir hvern 1, sem ekki er með heilaskaða, sem fremur sjálfsvíg fremja 2,38, með hafa hlotið slæma höfuðáverka, sjálfsvíg.

Hættan á að fólk fremji sjálfsvíg er mest fyrstu sex mánuðina eftir að fólk verður fyrir höfuðmeiðslum, eða þrefalt meiri en ella, en er áfram meiri það sem eftir er lífsins.