Í gær kom fyrsti sakborningurinn, S.A., fyrir dóminn í Herning í Danmörku. Maðurinn, sem er 25 ára, sagði ítrekað að það hefði verið svo „hugguleg stemning“ þessa nótt. Hann og félagar hans eru ákærðir fyrir að hafa neytt konuna til munnmaka, að hafa káfað á henni og að hafa sett hárbursta upp í endaþarm hennar. Þeir neita allir sök í málinu og segja að konan hafi tekið þátt í þessu af fúsum og frjálsum vilja.
Auk þessa máls eru mennirnir ákærðir fyrir þrjár aðrar nauðganir. Saksóknari krefst þungra fangelsisdóma yfir þeim öllum og að þremur þeirra verði vísað úr landi fyrir fullt og allt en þeir eru ekki danskir ríkisborgarar. Tveir þeirra eru frá Afganistan og sá þriðji frá Írak.
„Þetta var ekki til að brjóta á henni eða meiða hana. Það var svo hugguleg stemning hjá okkur.“
Sagði S.A. fyrir dómi í gær. Hann sagði að konan hefði aldrei sagt nei eða stopp, hún hafi gengið um, talað við þá, hafi sjálf afklætt sig að mestu og verið með fullri rænu. Sjálfur sagðist hann aðeins hafa snert brjóst hennar tvisvar og rass einu sinni.
Saksóknari er á öðru máli og segir að konunni hafi verið byrluð ólyfjan og muni ekki hvað gerðist þessa nótt. Þetta byggir saksóknarinn á upptökum sem mennirnir deildu á samfélagsmiðlum.
Rúmlega 10 myndbönd og margar ljósmyndir voru sýndar fyrir dómi í gær en aðeins dómari og málsaðilar fengu að sjá þau vegna innihalds þeirra.
Einn hinna ákærður, J.S, er 22 ára og er ákærður fyrir fjórar nauðganir sem ná allt aftur til 2013. Hann neitar ekki að hafa stundað kynlíf með konunum í málunum en heldur því fram að þær hafi tekið þátt af fúsum og frjálsum vilja. Það sama á við um ákærur á hendur M.B, sem er 26 ára og ákærður fyrir þrjár nauðganir þar sem J.S. er einnig ákærður. M.B. viðurkennir að hafa stundað kynlíf með konunum en segir að það hafi verið með þeirra samþykki.
