Samsæriskenningasmiðir hafa lengi fjallað um tunglið og tunglferðirnar eru í miklu uppáhaldi hjá mörgum þeirra. Því hefur meðal annars verið haldið fram að menn hafi aldrei farið til tunglsins, að tunglferðirnar hafi allar verið sviðsettar og allt saman tekið upp í kvikmyndaverum hér á jörðinni.
Undanfarin misseri hefur kenningu um að menn hafi ekki lent á tunglinu áratugum saman sé vegna þess að á bakhlið þess, hliðinni sem snýr frá jörðu, sé bækistöð geimvera sem hafi bannað okkur að koma aftur þangað vaxið ásmeginn og sífellt fleiri aðhyllast hana, að minnsta kosti þeir sem velta sér upp úr samsæriskenningum. Í þessu sambandi er talað um að á bakhlið tunglsins haldi háþróaðar geimverur til og vilji ekkert hafa með okkur mennina að gera og lái þeim hver sem vill ef þetta er rétt.
Á samsæriskenningavefsíðunni Ancient Code eru lesendur spurðir hvort þeir hafi velt fyrir sér af hverju menn hafi ekki farið til tunglsins nýlega?
„Samkvæmt því sem margir rannsakendur og sérfræðingar í málefnum fljúgandi furðuhluta segja þá er bandaríska geimferðastofnunin að fela ískyggilegt leyndarmál fyrir mannkyni. Við vitum ekki enn um allt sem hefur gerst á yfirborði tunglsins og er enn að gerast þar.“
Segir meðal annars á vefsíðunni. Þá er því einnig haldið fram þar að margir telji að næg gögn séu til staðar um að geimverur séu með bækistöð á tunglinu.
Samkvæmt fyrrnefndri kenningu þá hittu geimfarar NASA geimverur á tunglinu sem sögðu að menn ættu ekki að koma aftur þangað. Á Ancient Code segir að það að það séu bækistöðvar geimvera á tunglinu skýri af hverju menn hættu svo skyndilega að fara þangað. En kenningin teygir sig enn lengra og segir að geimverur séu að notfæra sér náttúruauðlindir tunglsins og þar haldi fljúgandi furðuhlutir til og þeir komi öðru hvoru til jarðarinnar.
En ætli það sé ekki rétt að taka þessu öllu saman með fyrirvara?