„Mamma, ef eitthvað kemur fyrir mig vil ég gefa líffærin úr mér,“ sagði hún við móður sína.
„Við áttum gott samtal en ég hélt að þetta myndi aldrei gerast. Það átti jú ekkert að koma fyrir Emblu. Svona hugsar maður.“
Sagði móðir hennar Linda Strandqvist í samtali við Aftonbladet.
En þann 11. júlí gjörbreyttist allt. Þá voru Linda og Embla á leið frá Helsingborg til Ystad ásamt systur Emblu, Edith sex ára, í heimsókn til foreldra Lindu. Dagurinn lofaði góðu, veðrið var gott og systurnar á leið í heimsókn til afa og ömmu sem þær héldu mikið upp á.
Á E4 hraðbrautinni lentu mæðgurnar í árekstri við flutningabíl, rétt utan við Helsingborg. Volvo fjölskyldunnar valt og gjöreyðilagðist. Edith slapp með kúlu á enninu og skurð á litla fingri. En Linda og Embla slösuðust meira og voru strax lagðar inn á gjörgæsludeild. Linda var meðvitundarlaus í fyrstu en kom fljótlega til meðvitundar. Þá skýrðu læknar foreldrunum frá að Embla væri heiladauð og ekki væri hægt að bjarga lífi hennar.
Foreldar Emblu virtu ósk hennar um að gefa líffæri sín og fengu sex börn líffæri úr henni og lifa áfram með þau.
Embla var jarðsett þann 8. ágúst frá kirkjunni í Pålsjö nærri Helsingborg. Fullt var út úr dyrum eða um 200 manns. Skólafélagar Emblu, ættingjar, vinir og félagar hennar úr fimleikafélaginu voru til staðar. Foreldrar hennar höfðu beðið fólk um að koma ekki með blóm og leggja frekar andvirði þeirra í sjóð sem þau hafa stofnað til minningar um Emblu. Nú hafa safnast sem nemur um tveimur og hálfri milljón íslenskra króna í sjóðinn.
Eftir nokkra mánuði fara foreldrar Emblu á sjúkrahúsið í Helsingborg til að fá upplýsingar um hvernig börnunum, sem fengu líffæri úr Emblu, vegnar.
