Mynd sem rataði í fjölmiðla fyrir nokkrum árum hefur fengið nýtt líf á samskiptamiðlum. Þá birti ung eiginkona og móðir mynd til að vara við skaðsemi fíkniefnaneyslu. Myndin vakti þá hörð viðbrögð og fór eins og eldur um sinu á Facebook.
Eva Holland frá Cinncinatti fylki í Bandaríkjunum missti eiginmann sinn Mike Settles. Þau höfðu verið saman í ellefu ár. Eftir að hafa fengið sterk verkjalyf vegna tannpínu varð Mike smám saman háður róandi lyfjum sem endaði með því að hann var kominn í neyslu sterkra fíkniefna. Banamein hans var of stór skammtur af heróíni.
„Ég er viss um að mörgum líði óþægilega þegar þeir horfa á myndina, sumir verða eflaust reiðir en ástæða þess að ég lét taka myndina er til að sýna raunveruleikann á bak við fíknina,“ sagði Eva á sínum tíma og bætti við:
Það hefði verið hægt að koma í veg fyrir þetta en rangar ákvarðanir kostuðu hann lífið. Ein röng ákvörðun splundraði fjölskyldunni hans. Ég veit að það eru margir uggandi yfir því að ég sé að birta þetta en með því að fela staðreyndir þá höldum við faraldrinum gangandi.