Aftonbladet skýrir frá þessu í dag og ber saman utanlandsferðir Svensson og rukkanir hans um aksturspeninga. Hann rukkaði þingið einnig um aksturspeninga fyrir ákveðinn akstur innanlands þegar hann var allt annarsstaðar í landinu á þeim tíma er hann sagðist hafa verið við akstur.
Svensson rukkaði þingið um aksturspeninga í janúar en þá sagðist hann hafa ekið 1.040 km þar á milli Falkenberg og Stokkhólms og til baka. Hann sagðist einnig hafa ekið til Gautaborgar, Jönköping og Borås. Í heildina krafði hann þingið um greiðslu fyrir 1.800 km akstur. En vandinn er bara sá að á þessum tíma var hann í fríi í Taílandi.
Þann 28. október 2017 fór hann til Ísrael í eina viku. Hann birti mynd af sér á Facebook þann 31. október þar sem hann var staddur í Jerúsalem. En samkvæmt akstursskýrslum hans var hann að aka á milli Falkenberg og Stokkhólms þennan sama dag.
Svona heldur upptalning Aftonbladet áfram og tekin eru dæmi af rukkunum Svensson á aksturskostnaði innanlands í Svíþjóð á meðan hann var í Þýskalandi, á Kanaríeyjunum, í Frakklandi, Austurríki og á Taívan.
Fyrir þessar ferðir, sem voru ekki farnar, fékk hann greiddar 15.000 sænskar krónur. Hann hefur fengið um 15.000 sænskar krónur í aksturspening á mánuði ofan á þingfararkaupið sem er 65.400 krónur.
Svensson virðist einnig hafa rukkað fyrir akstur innanlands daga sem hann var heima hjá sér eftir því sem hann sagði á Facebook.
Svensson vildi ekki tjá sig um málið við Aftonbladet annað en að í tölvupósti sagði hann að um „mistök og kæruleysi“ væri að ræða.
Þingkosningar eru í Svíþjóð þann 9. september og er þetta mál líklegt til að hafa áhrif á gengi Svensson og flokks hans.