Annað sem kom í ljós við samantekt málanna var að margir gerendanna voru undir áhrifum eiturlyfja og áfengis þegar þeir gripu til ofbeldis, þeir eru almennt með litla menntun og rúmlega þriðji hver hafði hlotið dóm áður fyrir önnur afbrot.
Niðurstöðurnar voru birtar í gær, 18 dögum áður en Svíar ganga að kjörborðinu og kjósa til þings. Stjórnendur Uppdrag Granskning segjast hafa ákveðið að birta niðurstöðurnar nú þar sem umræðan um nauðganir og þjóðerni gerenda hafi fram að þessu farið fram án þess að miklar staðreyndir lægju fyrir.
Hópnauðganir hafa verið mikið í umræðunni í Svíþjóð og í tengslum við þau mál hefur verið rætt um uppruna gerendanna og hvort það hafi áhrif á þá ef þeir koma frá löndum þar sem önnur sýn er á kvenfrelsi og kynfrelsi en er í Svíþjóð. Rannsóknir benda til að menn, fæddir utan Svíþjóðar, séu mjög áberandi í tölfræðinni yfir afbrot í Svíþjóð en ekki hafa verið gerðar um ástæður þess.
Í niðurstöðum samantektar Uppdrag Granskning kemur fram að 58 prósent þeirra sem hafa hlotið dóm fyrir nauðganir eða tilraunir til nauðgunar á síðust fimm árum eru fæddir utan Svíþjóðar.
Ef aðeins er litið á mál þar sem gerandi og fórnarlamb þekktust ekki er hlutfall útlendinga enn hærra eða tæplega áttatíu prósent. 40 prósent þeirra höfðu verið í Svíþjóð í eitt ár eða skemur þegar þeir brutu af sér.
Rúmlega helmingur mannanna eru fæddir utan Evrópu eða 427 af 843. Tæplega 40 prósent eru fæddir í Miðausturlöndum eða Afríku.
Ungir Afganar standa upp úr í tölfræðinni en þeir eru 45 af heildinni. Þetta er mjög lítið hlutfall Afgana, sem búa í Svíþjóð, en af dæmdum nauðgurum eru Afganir næststærsti hópurinn á eftir Svíum.
Innflytjendamál, afbrot og löggæsla brenna þungt á sænskum kjósendum og því er ekki ólíklegt að niðurstaða samantektar Uppdrag Granskning muni hleypa enn frekara lífi í kosningabaráttuna.
