Enn vex peningaþvættishneykslið sem Danske Bank, stærsti banki Danmerkur, er flæktur í. Á undanförnum mánuðum hefur komið fram að margir milljarðar danskra króna streymdu í gegnum útibú bankans í Eistlandi á undanförnum árum og er talið að þar hafi verið um peningaþvætti að ræða en engar haldbærar skýringar hafa fundist á þessum miklu fjármagnsflutningum.

En nú hefur enn bæst í hneykslið því á mánudaginn skýrði Financial Times frá því að 3.000 erlendir viðskiptavinir bankans hafi flutt 192 milljarða danskra króna í gegnum eistneska útibúið á aðeins einu ári, árið 2013. Grunur leikur á að hér hafi einnig verið um peningaþvætti að ræða. Ef rétt reynist þá er þetta hugsanlega stærsta peningaþvættismál í sögu evrópskra fjármálastofnana.

Upphæðirnar, sem fóru í gegnum eistneska útibúið, eru mjög háar fyrir ekki stærra útibú en þær svara til þess að hver þessara 3.000 viðskiptavina hafi flutt 60 milljónir danskra króna þar í gegn árið 2013.

Það eykur á grunsemdir um peningaþvætti að milljarðarnir 192 komu aðallega frá viðskiptavinum í Rússlandi og fyrrum ríkjum Sovétríkjanna. Áður hafði komið fram að peningar sem fóru í gegnum eistneska útibúið hafi tengst einræðisstjórninni í Aserbaísjan, Rússum sem tengjast Vladimír Pútín forseta og fjölskyldu hans og bakmönnunum á bak við misheppnað vopnasmygl frá Norður-Kóreu til Íran 2009.