Ritstjórn blaðsins tekur fram að það sé mjög óvenjulegt að birta nafnlausar greinar sem þessa en að þessu sinni sé það gert til að vernda greinarhöfund því hann eigi á hættu að missa starf sitt. Ritstjórnin veit hver maðurinn er og birti því greinina. Höfundurinn er tilnefndur til starfa af Trump sjálfum og því ekki venjulegur opinber embættismaður.
„Vandinn, sem Trump skilur ekki alveg, er að margir háttsettir embættismenn í stjórn hans vinna hörðum höndum að því að grafa undan stefnu hans. Ég veit það, því ég er einn þeirra.“
Segir meðal annars í greininni. Embættismaðurinn lýsir síðan hvernig tvær stefnur ráða ríkjum í Hvíta húsinu. Trump segir eitt og starfsmenn hans geri meðvitað allt annað og reki þar með sína eigin stefnu. Greinarhöfundur segir einnig að meðal embættismanna og annarra samstarfsmanna Trump sé rætt um að virkja 25. grein viðauka stjórnarskrárinnar. Samkvæmt henni geta ráðherrar sett forsetann af ef hann er talinn óhæfur til að gegna embættisskyldum sínum. Í slíkum tilfellum tekur varaforsetinn við sem forseti. Greinarhöfundur segir að ástæða þessarar umræðu sé það „ójafnvægi“ sem forsetinn er í.
Trump brást ókvæða við á Twitter í gærkvöldi og skrifaði óvenjulega stutta færslu, aðeins eitt orð:
„Landráð?“
Tæpum tveimur klukkustundum síðar var hann mættur við lyklaborðið á nýjan leik og skrifaði:
„Er þessi svokallaði „háttsetti embættismaður“ til eða er hann uppspuni hins lélega New York Time sem hefur notað enn einn falskan heimildarmann?“
Sagði Trump og bætti við:
„Ef þessi huglausi og nafnlausi maður er til í raun og veru verður The Times (The New York Times, innskot blaðamanns) að upplýsa hver hann er strax vegna þjóðaröryggis!“