Christian Axboe Nielsen, sérfræðingur í málefnum Balkanskagans hjá Árósaháskóla, sagði í samtali við Jótlandspóstinn að með því að breyta landamærunum vegna íbúasamsetningarinnar sé verið að endurtaka sumar þeirra ákvarðana sem komu stríðinu á Balkanskaga af stað á tíunda áratugnum. Hann sagði að í 20 ár hafi ESB staðið fast á að ekki eigi að breyta landamærum á Balkanskaganum vegna hættunnar á að það valdi stríði og hörmungum. Meginreglan hafi verið að fara eigi vel með minnihlutahópa í ríkjunum og forðast breytingar á landamærum. Nú styðji hins vegar ESB og Bandaríkin breytingar á landamærum til að hægt sé að búa til ríki sem eru einsleit hvað varðar íbúa og án minnihlutahópa. Þetta eru stór mistök að hans sögn.
Carl Bildt, fyrrum forsætisráðherra Svíþjóðar og fyrrum sérstakur sendimaður ESB á Balkanskaga, og tveir aðrir fyrrum sendimenn ESB á skaganum, hafa tjáð sig um málið og segja það mistök. Þetta verði misnotað af þjóðernissinnum til að krefjast enn frekari breytinga á landamærum og muni raska jafnvæginu í öðrum ríkjum.
Meðal þeirra hættu sem er talin á ferðum er að í kjölfarið muni Bosnía og Makedónía krefjast breytinga á landamærum sínum og það sama geti sjálfstæðissinnar í Úkraínu og á Spáni gert. Með því að styðja þessar breytingar eru ESB og Bandaríkin því að margra mati að skapa nýtt fordæmi sem aðrir geta nýtt sér til að styrkja kröfur sínar.
Yfirvöld í Þýskalandi, Bretlandi og Króatíu eru á móti breytingunum og í vikunni sagði forsætisráðherra Króatíu að breytingar á landamærunum þýði stríð.