Það er erfitt, flókið og dýrt að skjóta geimflaugum á loft auk þess sem mikil mengun fylgir geimskotum. Eitt af því sem hefur stundum verið nefnt til sögunnar sem hugsanleg lausn á þessu er að byggja lyftu frá jörðinni út fyrir gufuhvolfið. Þetta hljómar eiginlega brjálæðislega og virðist helst eiga heima í vísindaskálsögu. En vísindamenn taka þetta alvarlega og nú eru japanskir vísindamenn að hefja tilraunir með slíka lyftu.

Á þriðjudaginn ætla vísindamenn við verkfræðideild Shizuoka háskólans að skjóta litlu líkani af geimlyftu á braut um jörðina. Þetta eru tveir litlir teningslaga kubbar, hver hlið er 10 sm, sem eru tengdir með 10 metra stálkapli. Vélknúinn kassi mun fara eftir kaplinum á milli kubbanna. Fylgst verður með þessu öllum með myndavélum. Þetta er í fyrsta sinn sem tilraunir verða gerðar á hreyfingum lyftu í geimnum. Sciencealert.com skýrir frá þessu.

Verkfræðingar hafa látið sig dreyma um geimlyftur í rúmlega 100 ár eða síðan rússneski vísindamaðurinn Konstantin Tsiolkovsky fékk þessa hugmynd 1895 þegar hann leit Eiffel turninn augum. Hugmyndin hefur margoft verið notuð í vísindaskáldskap síðan en nú er hún hugsanlega að færast yfir í raunveruleikann.

Það er ljóst að það yrði gríðarlegt verkfræðilegt afrek að smíða slíka lyftu. Hún þarf að vera úr efni sem er svo létt að það hrynji ekki saman undan eigin þunga. Þá þarf slík lyfta að geta staðist þyngdarafl jarðainnar, sólarinnar og tunglsins auk veðurs og vinda hér á jörðinni.

Japanska fyrirtækið Obayashi Corp, sem starfar með Shizuoka háskólanum að rannsóknum á þessu sviði, hefur sagt að það vonist til að vera komið með nothæfa geimlyftu árið 2050. Hún myndi teygja sig frá palli í Kyrrahafi upp í geimstöð sem væri á braut um jörðina í 35.000 km hæð.