Í Þýskalandi er nú verið að reisa nýjan bæ, sem hefur fengið heitið Schnöggersburg, sem kostar sem svarar til um 20 milljarða íslenskra króna. Það sem er sérstakt við þennan bæ er að þar mun enginn fá að búa. Bærinn er nú að rísa vestan við Berlín. Í honum verða háhýsi og stórmarkaðir, lestarstöðvar og spilavíti. Bærinn er engin smásmíði því hann þekur svæði á við 840 knattspyrnuvelli.

Það er þýska fyrirtækið Rheinmetall AG sem reisir bæinn en hann er ætlaður til æfinga fyrir þýska herinn og hersveitir frá NATO og ESB. Þar geta hermenn æft stríðsrekstur í stórum bæ. Ávinningur Rheinmetall AG af þessu er að fyrirtækið selur tæknilausnir til hernaðarnota og til bílaiðnaðarins.

Nútímatækni verður nýtt til hins ítrasta í Schnöggersburg enda eru möguleikarnir nánast óþrjótandi. Til að gera æfingarnar í bænum sem raunverulegastar hefur verið sett upp æfingakerfi byggt á lasertækni en með því er hægt að skrá allar æfingar í bænum nákvæmlega og greina þær niður í kjölinn.