Svíþjóðardemókratarnir fá 19,2 prósenta fylgi samkvæmt útgönguspánni. Moderaterne tapa miklu fylgi og fá nú 17,8 prósent en fengu 23 prósent í kosningunum 2014. Þetta gerir að verkum að Svíþjóðardemókratarnir eru nú næststærsti flokkur landsins. Þeir fengu 13 prósent atkvæða í kosningunum 2014.
Það ber þó að taka útgönguspám með ákveðnum fyrirvara og rétt er að benda á að í kosningunum 2014 voru útgönguspár allra stóru fjölmiðlanna nokkuð langt frá endanlegri niðurstöðu.
Ef útgönguspá SVT gengur eftir þá er uppi flókin staða hvað varðar stjórnarmyndum þar sem hvorug blokkin, blokk vinstri manna annars vegar og blokk borgaralegu flokkanna hins vegar, hefur náð meirihluta. Báðar blokkirnar hafa fyrirfram hafnað öllu samstarfi við Svíþjóðardemókratana. Stefan Löfven, formaður jafnaðarmannaflokksins og núverandi forsætisráðherra, hefur sagt Svíþjóðardemókratana vera „rasistaflokk með rætur í nasisma“. Ulf Kristersson, leiðtogi Moderateren og forsætisráðherraefni borgararlegu flokkanna, hefur lýst því yfir að samstarf við Svíþjóðardemókratana komi ekki til greina en að þeim sé velkomið að styðja stefnu hans.
Blokk vinstriflokkanna mælist með 39,4 prósent atkvæða og blokk borgaralegu flokkana með 39,6 prósent atkvæða.