Fellibylurinn Florence stefnir nú á austurströnd Bandaríkjanna og er búist við að hann skelli á Suður- og Norður-Karólínu auk Virginíu á föstudagsmorgun að íslenskum tíma. Florence er nú fjórða stigs fellibylur en fellibyljir eru flokkaðir í fimm styrkleikaflokka og er fjórða stig næst efsta stigið. Florence er enn að styrkjast og reikna veðurfræðingar með að hún verði fimmta stigs fellibylur innan skamms. Meðalvindhraði hefur mælst 220 km/klst.

Bandaríska fellibyljastofnunin, NHC, segir að Florence nái líklega 5 stigi styrkleika í dag og verði meðalvindhraðinn þá rúmlega 69 m/s. Slíkt ofsaveður getur haft mikla eyðileggingu í för með sér. NHC sagði í tilkynningu í gær að öruggt væri að Florence verði stór og mjög hættulegur fellibylur.

Henry McMaster, ríkisstjóri í Suður-Karólínu, hefur ákveðið að fyrirskipa brottflutning um einnar milljónar íbúa við strönd ríkisins. Roy Cooper, ríkisstjóri í Norður-Karólínu, hefur varað íbúa ríkisins við yfirvofandi óveðri en hefur ekki fyrirskipað rýmingar að sinni.

245.000 íbúar á lágt liggjandi svæðum í Virginíu fengu í gær fyrirmæli um að yfirgefa heimili sín vegna Florence. Þessi svæði eru mjög viðkvæm fyrir flóðum.

Bandaríski sjóherinn hefur ákveðið að senda um 30 herskip, sem liggja venjulega í höfn í Virginíu, á sjó til að forða þeim undan Florence.

American Airlines og Southwest Airlines hafa ákveðið að leyfa farþegum, sem eiga pantað far til og frá væntanlegum áhrifasvæðum fellibylsins frá miðvikudegi til sunnudags, að breyta pöntunum sínum án endurgjalds.