Leit hefur verið hætt að þýska tónlistarmanninum Daniel Kaiser-Kueblboeck sem hvarf á sunnudag þegar hann var á skemmtiferðaskipi. Daniel var nokkuð þekktur í heimalandi sínu og varð hann til dæmis í þriðja sæti í Pop Idol-hæfileikakeppninni árið 2003.

Daniel var í skemmtiferðaskipi Aida Cruises og var skipið skammt frá ströndum Kanada þegar tilkynnt var um hvarf hans. Sjónarvottur sagðist hafa séð til manns stökkva frá borði og telur lögreglan víst að það hafi verið Daniel.

Umfangsmikil leit hefur staðið yfir síðan tilkynnt var um hvarf hans en skipulagðri leit hefur nú verið hætt. Daniel, sem var 33 ára, öðlaðist frama bæði sem tónlistarmaður og sjónvarpsmaður eftir að hann skaust fram á sjónarsviðið árið 2003. Hann tók þátt í undankeppni Eurovision árið 2014 en var ekki valinn til að syngja í lokakeppninni. Þá tók hann þátt í hæfileikakeppninni Let’s Dance árið 2015.

Aðeins eru nokkrir mánuðir síðan hann opnaði sig um einelti sem hann varð fyrir sem barn. Eineltið sagði hann hafa markað djúp spor í sálarlíf hans og hann hafi glímt við vanlíðan allar götur síðan.

Skipið sem Daniel var farþegi í var á leið frá Hamburg í Þýskalandi til Nýfundnalands.