Sjö barna móðir í Kristiansand í Noregi hefur verið ákærð fyrir tvö morð. Hún er grunuð um að hafa myrt föður sinn og fyrrum sambýlismann sinn. Hún neitar sök. Saksóknari telur að konan hafi eitrað fyrir föður sínum eða drekkt honum og að hún hafi eitrað fyrir fyrrum sambýlismanni sínum eða kyrkt hann.

Lögreglan kynnti rannsókn sína á málinu í september á síðasta ári á fréttamannafundi en þá hafði konan verið handtekin. Fyrrum sambýlismaður hennar fannst látinn á hóteli í Kristiansand 2014. Hann var 67 ára. Rannsókn á því máli beindi sjónum lögreglunnar að konunni og láti föður hennar, 52 ára, árið 2002. Hann fannst látinn í baðkari á heimili sínu í Kristiansand. Lík hans var ekki krufið því lögreglan komst að þeirri niðurstöðu að hann hefði látist af eðlilegum orsökum.

Norska ríkisútvarpið hefur eftir ættingja konunnar, úr föðurfjölskyldu hennar, að fjölskyldan sé ekki hissa á ákærunum. Hana hafi alltaf grunað að faðir hennar hafi verið myrtur og hafi viljað láta kryfja hann en það hafi ekki verið gert.

Lík föðursins var grafið upp í desember á síðasta ári svo réttarmeinafræðingar gætu rannsakað það. Á grunni þeirrar rannsóknar ákærir saksóknari konuna fyrir að hafa þrýst föður sínum ofan í baðkarið.