53 ára Breti, Edward Putman, hefur verið ákærður fyrir fjársvik. Þetta væri ekki í frásögur færandi nema fyrir þær sakir að Edward virðist hafa tekist á einhvern ótrúlegan hátt að leysa út 370 milljóna króna lottóvinning þrátt fyrir að hafa aldrei unnið í lottóinu.
Það var fyrir níu árum að Putman steig fram og framvísaði lottómiða sem hann sagði innihalda vinningstölurnar. Útdrátturinn hafði farið fram sex mánuðum áður og mætti Putman á skrifstofu National Lottery rétt áður en fresturinn rann út til að vitja vinningsins.
Putman tókst hið ótrúlega. Hann plataði starfsfólk National Lottery í Bretlandi og fékk vinninginn greiddan. Þetta tókst honum þó að strikamerki á miðanum hafi ekki virkað sem skildi. Peningana notaði hann meðal annars til að kaupa sér lúxushús og bílaflota.
Það var svo fyrir þremur árum að breska lögreglan hóf rannsókn á málinu vegna gruns um að ekki væri allt með felldu. Edward var handtekinn í kjölfarið og Camelot, fyrirtækið sem rekur lottóið, sektað um þrjár milljónir punda. Edward var hins vegar sleppt úr haldi þar sem Camelot var talið hafa týnt miðanum sem Edward framvísaði á sínum tíma. En Putman hefur nú verið ákærður vegna málsins og er hann væntanlegur fyrir dómara í októbermánuði.
Ekki liggur fyrir hvað varð til þess að lögreglan komst aftur á sporið við rannsókn málsins, en samkvæmt ákæru falsaði hann vinningsmiðann.
Sem fyrr segir notaði Putman vinninginn til að kaupa sér ýmislegt, hús og bíla til dæmis. Hann keypti eitt hús á 600 þúsund pund, annað á 400 þúsund pund og að minnsta kosti tíu bifreiðar. Verði Putman fundinn sekur eru miklar líkur á að honum verði gert að endurgreiða vinninginn, 2,5 milljónir punda.