8.000 Norðmenn hafa upplýst skattayfirvöld um ávinning sinn af viðskiptum með rafmyntir og hvað þeir eiga mikið í rafmyntum. Hans Christian Holte, skattstjóri, telur þó að betur megi gera og mikið vanti upp á að allir hafi gert grein fyrir eign sinni í rafmynt og ávinningi af slíkum viðskiptum.

Á síðasta ári námu uppgefnar eignir Norðmanna í rafmyntum 5 milljörðum norskra króna en það telur skattstjórinn ekki vera rétt, upphæðin sé mun hærri. Samkvæmt gögnum sem Dagens Næringsliv hefur aðgang að þá töldu um 8.000 Norðmenn rafmyntaeign sína fram á skattframtali á síðasta ári en skattayfirvöld telja að um 30.000 Norðmenn eigi rafmyntir. Ef rétt reynist er ljóst að mikið vantar upp á að ríkissjóður fái þær skattgreiðslu sem honum ber.

Bitcoin er vinsælasta og elsta rafmyntin en alls eru til um 1.000 mismunandi rafmyntir í heiminum.