Þeim fer fjölgandi sem svelta í heiminum. Sameinuðu þjóðirnar áætla að 812 milljónir manna hafi soltið á síðasta ári. Það svarar til þess að níundi hver jarðarbúi hafi soltið. Þetta var þriðja árið í röð sem sveltandi fólki fjölgar. Á sama tíma fjölgar þeim mikið sem glíma við offitu.

Þetta kemur fram í nýrri skýrslu frá Sameinuðu þjóðunum um fæðuöryggi og næringu á heimsvísu. Í fréttatilkynningu segir að viðvörunarbjöllur glymji vegna minna fæðuöryggis og mikils fjölda fólks sem sveltur og býr við vannæringu. Þetta sýni að langt sé í land að búið verði að útrýma hungri fyrir 2030.

Fram kemur að takast verði á við afleiðingar loftslagsbreytinga sem gera landbúnað erfiðari sem aftur hefur í för með sér að matvælaverð hækkar. Samhliða því eykst hungur meðal þeirra fátækustu.

Þversögnin í þessu öllu saman er að á sama tíma og sveltandi fólki fjölgar eykst fjöldi þeirra sem glíma við offitu. Verst er ástandið í Norður-Ameríku en það fer einnig versnandi í Asíu og Afríku. Aðalástæðan er að hollur og næringargóður matur er dýrari en óhollur matur.