Leikkona, sem er meðal annars þekkt fyrir leik í X-Men myndunum, hvarf sporlaust í sumar og hefur raunar ekki sést síðan 1. júlí síðastliðinn. Þá hefur ekkert gerst á samfélagsmiðlum hennar síðan í júní. Margir klóra sér nú í kollinum vegna málsins.

Leikkonan sem um ræðir heitir Fan Bingbing og er ein þekktasta leikkona Kína; hefur leikið í yfir 50 myndum á ferli sínum. Þá hefur hefur hún einnig notið vinsælda sem söngkona. Bingbing, sem er 36 ára, sást síðast opinberlega þann 1. júlí síðastliðinn þegar hún heimsótti barnaspítala í heimalandinu. Um það bil mánuði áður hætti hún að uppfæra samfélagsmiðla sína.

Það sem vekur ekki síður athygli er að kærasti hennar, leikarinn Li Chen, sem er öllu minna þekktur, er einnig horfinn.

Ýmsir hafa velt vöngum yfir því að ástæða hvarfsins sé sú að Bingbing hafi svikið undan sköttum í heimalandinu. Nemendur við Beijing Normal University gerðu ekki alls fyrir löngu samantekt um samfélagslega ábyrgð kínverskra stjarna; leikara og tónlistarmanna þar á meðal. Skemmst er frá því að segja að Bingbing kom illa út úr samanburðinum og var í neðsta sæti.

Bent hefur verið á það að Bingbing hafi horfið skömmu eftir að kínverska ríkisfréttastofan greindi frá því að hún hafi að líkindum svikið undan sköttum. Átt hafi verið við samning sem hún gerði við framleiðslufyrirtæki í Kína sem gerði það að verkum að hún greiddi minni skatt en ella.

Ekki hefur fengist staðfest opinberlega hvað varð um leikkonuna en margir gera því skóna að hún hafi verið handtekin vegna meintra skattsvika og það skýri hvarf hennar.