Í nótt var Florence um 1.200 km suðaustan við Cape Fear í Norður-Karólínu. Vindstyrkur hennar er mikill en hann hefur mælst allt að 225 km/klst í hviðum. Reiknað er með að Florence taki land í Bandaríkjunum aðfaranótt föstudags að íslenskum tíma. Henni fylgir sterkur vindur og mikil úrkoma.
Donald Trump, forseti, hefur lýst yfir neyðarástandi í Norður-Karólínu, Suður-Karólínu og Virginíu en það þýðir að ríkin munu fá aðstoð frá alríkinu við að takast á við afleiðingar Florence. Roy Cooper, ríkisstjóri í Norður-Karólínu, sagði í gær að Florence væri skrímsli, lífshættulegur fellibylur.
Sérfræðingar óttast afleiðingar Florence þegar hún tekur land en það eru aðallega þrjú atriði sem auka á áhyggjur manna.
Sjávarhiti er einni og hálfri gráðu hærri en venjulega sem þýðir að Florence fær aukinn kraft og meiri rigning fylgir henni.
Vindmynstur hafa í för með sér að Florence er mjög öflug og verður það.
Florence nær yfir gríðarlega stórt svæði og áhrifa hennar mun því gæta á mjög stóru svæði.
Ken Graham, yfirmaður fellibyljamiðstöðvarinnar í Miami hefur miklar áhyggjur af Florence og segist hræðast hana mjög mikið. Henni fylgi mikil úrkoma, mikil flóð og vindstyrkurinn sé mikill. Fellibyljamiðstöðin reiknar með að úrkoman, sem fylgir Florence, verði um 60 sm en geti orðið allt að 90 sm á sumum svæðum.
Florence er í fjórða styrkleikaflokki fellibylja en þeir eru fimm, talið er að hún muni ná fimmta stigi áður en hún skellur á austurströndinni. Svo öflugur fellibylur hefur ekki skollið á ríkin þrjú, sem verða fyrir Florence, síðan 1954. Aðeins hafa tveir fellibyljir í fjórða styrkleikaflokki skollið á þessu svæði austurstrandarinnar síðan farið var að halda skrá yfir fellibylji í kringum 1850. Það var Hazel 1954 og Hugo 1989.