Framkvæmdastjórn ESB hefur kynnt hugmynd um að setja á laggirnar 10.000 manna vopnaða landamærasveit sem á að gæta ytri landamæra ESB en einnig þeirra innri. Þetta á að gera til að reyna að hemja straum flóttamanna og innflytjenda til álfunnar.

Í ræðu á Evrópuþinginu sagði Jean Claude-Juncker, forseti framkvæmdaráðs Evrópusambandsins, að framkvæmdastjórnin muni leggja fram tillögu um þetta. Hann sagði að ekki verði lokað fyrir „löglegar komur innflytjenda til ESB“. Auk þess að gæta landamæra Evrópu mun landamærasveitin geta starfað utan Evrópu ef önnur ríki heimila það.

„Þetta þýðir ekki hervæðingu ESB en við verðum að geta varið íbúana fyrir innri og ytri ógnum. Við verðum að vera sjálfstæðari í að verja bandalagið. En við megum aldrei verða virki sem snýr baki við þeim hluta heims sem þjáist.“

Sagði Juncker.

Landamærasveitin er hluti af breytingum á hælisleitendakerfinu í Evrópu en leiðtogar ESB náðu samkomulagi í sumar um að breyta því. Meðal annars á að kanna möguleikana á að koma upp söfnunarmiðstöðvum í ríkjum utan Evrópu fyrir innflytjendur og álíka miðstöðvum í Evrópu fyrir innflytjendur sem eru teknir upp í skip og báta í lögsögu ESB.