Fyrir þremur árum var dregið úr umfangi rannsóknarinnar og var lögreglumönnum, sem unnu að henni, fækkað úr 29 niður í 4. Daily Mail segir að nú stefni í að rannsókninni verði alveg hætt vegna fárra vísbendinga sem lögreglan hefur til að fylgja eftir og fjárskorts.
Foreldrar Madeleine, Kate og Gerry McCann, óttast að nú ljúki rannsókninni endanlega. Heimildarmaður Daily Mail sagði að þetta sé ekki í fyrsta sinn sem þessi staða er uppi og óvissa foreldranna um framhald rannsóknarinnar sé mikil. Enn einu sinni séu þau í þessari hræðilegu stöðu.
Lögreglunni hefur ekki tekist að finna neinar nýjar vísbendingar þrátt fyrir fjölda ferða til Portúgal á undanförnum árum. Mirror segir að lögreglan hafi ekki farið fram á meiri fjárveitingar til rannsóknarinnar. Rannsóknin hefur staðið yfir í 11 ár og hefur kostað um 11 milljónir punda.
Kate McCann hefur skýrt frá því að hún kaupi enn afmælis- og jólagjafir handa Madeleine en hún er nú 15 ára ef hún er enn á lífi.
Málið hefur verið mikil ráðgáta allt frá upphafi og heimsbyggðin hefur fengið reglulegar fréttir af því. Margar kenningar hafa verið á lofti um hvað hafi orðið um Madeleine. Ein er að innbrotsþjófar hafi numið hana á brott þegar örvænting greip þá. Önnur er að barnlaust par hafi rænt henni til að verða sér úti um barn. Enn ein er að foreldrar hennar hafi óvart orðið henni að bana og hafi losað sig við lík hennar. Aðrir telja að hún hafi lent í slysi og enn aðrir að henni hafi verið rænt til að selja áfram mansali. Breska lögreglan hefur meðal annars unnið út frá þeirri kenningu að Madeleine hafi verið seld til barnaníðinga í Búlgaríu.