Sex létust af völdum skotsára í Bakersfield í Kaliforníu síðdegis í gær. Málið hófst á sjötta tímanum þegar tilkynnt var um skothríð í höfuðstöðvum dráttarbílafyrirtækis. Þangað höfðu karl og kona, hjón, komið og lent í rifrildi við starfsmann. Maðurinn skaut starfsmanninn til bana að sögn lögreglunnar og því næst eiginkonu sína.

Þá kom annar maður á vettvang en var skotinn til bana af hinum grunaða eftir að hafa reynt að flýja undan honum. Hinn grunaði ók síðan að elliheimili í bænum og skaut tvennt til bana þar. Því næst rændi hann bíl. Kona og barn sem voru í bílnum komust heil á húfi frá manninum. Maðurinn ók því næst út fyrir bæinn þar sem lögreglumaður kom auga á hann. Áður en hann gat handtekið hinn grunaða tók hinn grunaði eigið líf.