Samkvæmt tölum frá embætti danska ríkislögreglustjórans hafa 2.835 hælisleitendur horfið sporlaust þar í landi. Allt er þetta fólk sem hefur fengið höfnun á hælisumsóknum. Talið er að margir séu enn í Danmörku og fari leynt. Einnig er talið að margir hafi farið úr landi og að sumir hafi jafnvel farið aftur heim.

Auk þessara 2.835 horfnu hælisleitenda veit lögreglan heldur ekki hvar 2.729 hælisleitendur, sem bíða eftir svari við hælisumsóknum, eru.

Þetta kemur fram í umfjöllun Radio24syv. Þar er haft eftir Trine Bramsen, talsmanni jafnaðarmanna í málefnum réttarvörslukerfisins, að þetta sé mikið áhyggjuefni. Hugsanlega sé fólkið enn í Danmörku og vinni þar ólöglega og grafi þar með undan dönskum vinnumarkaði. Í versta falli séu hugsanlegir hryðjuverkamenn í þessum hópi. Hún telur að lögreglan eigi að gera meira til að hafa uppi á þessu fólki.