Ellefu ára piltur má teljast heppinn ef hann nær sér að fullu eftir ljótan hrekk eldri drengja. Pilturinn sem um ræðir, Tyler Broome, var staddur á leikvelli þegar hópur eldri drengja kom að honum.

Á leikvellinum er hringekja og höfðu piltarnir séð myndbönd af hættulegum leik sem snýst um að halda sér á hringekju á meðan henni er snúið af miklu afli. Hér dugar handaflið eitt ekki til og er mótorhjól oftar en ekki notað til að hringekjan nái sem mestum hraða. Það er einmitt það sem unglingarnir gerðu, en þessi gjörningur gengur stundum undir nafninu hringekja dauðans – og ekki að ástæðulausu.

Eins og meðfylgjandi myndir bera með sér fór Tyler, sem er búsettur í Tuxford í Nottinghamshire á Englandi, illa út úr þessum hættulega leik. Augu hans bólgnuðu mjög vegna þyngdarkraftsins og segja læknar að mögulega verði Tyler í aukinni áhættu á að fá heilablóðfall í framtíðinni.

Myndband af atvikinu hefur verið birt í breskum fjölmiðlum. Á því má sjá Tyler, að því er virðist meðvitundarlausan, á hringekjunni á meðan ungmennin halda áfram að snúa henni.

Móðir Tylers, Dawn Hollingworth, segir að ungmennin hafi ætlað að leika eftir myndband sem þau sáu á YouTube. Hún segir að Tyler sé enn á spítala og hún vonist til þess að bólgurnar minnki svo hægt sé að meta hvort einhver varanlegur skaði hafi orðið. Læknar telji að um 4-6 vikur líði þar til það kemur í ljós.

Eftir að Tyler komst undir læknishendur skrifaði Dawn færslu um málið á Facebook þar sem hún varaði við afleiðingum þessa hættulega leiks. Hvetur hún börn – og unglinga – að láta af því að leika þetta eftir enda geta afleiðingarnar verið skelfilegar, eins og þetta dæmi sýnir.