Dramatísk björgunaraðgerð fór fram við Flatøy í Askvoll sveitarfélaginu í Noregi í nótt. Þar var fjórum mönnum bjargað úr brennandi flutningaskipi. Eldur kom upp í vélarrúmi flutningaskipsins Haiko í Vilnesfjorden og rak það upp á land við Flatøy. Fyrstu tilkynningar um þetta bárust um miðnætti.

Fjórum áhafnarmeðlimum var bjargað úr skíðlogandi skipinu. VG segir að áhafnarmeðlimirnir séu heilir á húfi nema hvað einn sé hugsanlega handleggsbrotinn.

Aðstæður á vettvangi voru mjög erfiðar, mjög hvasst var og erfitt fyrir björgunarþyrlu að athafna sig sem og áhafnir þeirra sex báta sem komu að björguninni. Það tókst samt sem áður að bjarga áhöfninni frá borði. Þremur var bjargað um borð í þyrlu og einum um borð í nærstaddan bát.