Umferðarslys í Watertown í Massachusetts í Bandaríkjunum varð til þess að kona lést og karlmaður var stunginn og hlaut lífshættulega áverka. Talið er að sonur konunnar hafi ráðist á bílstjórann sem varð valdur að slysinu og stungið hann.
Í frétt Boston Globe kemur fram að ökumaður dráttarbíls hafi ekið á konuna sem var fótgangandi. Karlmaður sem var með konunni í för brást ókvæða við, réðst á bílstjórann og stakk hann margsinnis í kviðinn. Hann er sagður hafa öskrað að bílstjóranum: „Þú drapst mömmu mína.“
Bílstjórinn er sagður hafa reynt að róa manninn, sagt honum að um slys hafi verið að ræða og hann hafi ekki séð konuna. Árásarmaðurinn tók ekki mark á þeim útskýringum og stakk bílstjórann margsinnis.
Bílstjórinn var fluttur alvarlega slasaður á sjúkrahús en konan var úrskurðuð látin. Árásarmaðurinn var svo færður í fangaklefa lögreglu þar sem hans bíður ákæra.