Lengi hefur verið talað um að fólk skiptist í tvo hópa, A- og B-manneskjur en síðan komust vísindamenn að því að einnig eru til C- og D-manneskjur. Kannski þurfa því sumir að sætta sig við að færast á milli hópa.
Vísindamennirnir segja að A-manneskja sé einstaklingur sem fer snemma að sofa og snemma á fætur og sé orkumestur á milli klukkan 9 og 21.
B-manneskja sé svokallaður næturhrafn, vaki langt frameftir, láti vekjaraklukkuna hringja mörgum sinnum áður en farið er á fætur en fótaferðartíminn er yfirleitt ekki fyrr en langt er liðið á morguninn. B-manneskjur eru upp á sitt besta frá klukkan 21 til 9. Algjörlega öfugt við A-manneskjurnar.
C-manneskjur eru ofurmennin sem við öfundum öll. Fólk í þessum hópi sefur að meðaltali 30 mínútum minna en aðrir en þrátt fyrir það eru C-manneskjur upp á sitt besta á öllum tímum sólarhringsins. Til hamingju ef þú ert C-manneskja!
D-manneskja er sífellt þreytt, á öllum tímum sólarhringsins. Þær geta farið til læknis og látið rannsaka hvort þær fá nægilega mikið af vítamínum og þess háttar en því miður er það ekki til neins, sumir eru bara þannig að þeir vilja helst liggja í rúminu allan daginn.
Það voru síbírískir vísindamenn við Russian Academy of Sciences sem rannsökuðu þetta og birtu svo niðurstöður sínar í tímaritinu Personality and Individual Differences að sögn dagens.dk. 130 manns tóku þátt í rannsókninni og voru látnir halda sér vakandi í 24 tíma í einu. Síðan var fólkið spurt út í dægurryþma þess, orku og hvernig það hafði staðið sig undanfarna viku. Út frá þessu komust þeir að því að til væru fjórar tegundir fólks.