Fingur þínir og hendur geta verið þaktar bakteríum og því er rétt að hafa í huga að suma líkamshluta er best að snerta ekki nema auðvitað bráða nauðsyn beri til. Hendurnar og fingurnir dreifa auðveldlega bakteríum.

Þrátt fyrir að hendurnar séu þvegnar vel og vandlega þá verða þær fljótt þaktar bakteríum á nýjan leik enda allt stútfullt af þeim í umhverfi okkar. Fólk með langar neglur og hring á fingri er með meira magn af bakteríum á höndunum en aðrir og ætti því að vera sérstaklega meðvitað um þetta. Ekstra Bladet birti nýlega lista yfir þá líkamshluta sem er ráðlegt að forðast að snerta mikið og birtum við hann hér.

Eyrun

Aldrei ætti að stinga fingrum eða öðru í eyrun . John K. Niparko, prófessor, segir að það geti rifið þunna húðina í eyrunum. Það er því betra að fara til háls-, nef- og eyrnalæknis en að freista gæfunnar sjálfur.

Andlitið

Það má nota hendurnar til að þvo andlitið eða setja krem á það en annars á að halda höndunum frá því. Það getur nefnilega aukið hættuna á veikindum ef hendurnar hafa snert bakteríuþakið yfirborð og síðan snert andlitið. Auk þess eru olíur á fingrunum sem geta stíflað svitaholur að sögn Adnan Nasir, húðsjúkdómasérfræðings tímaritsins Men‘s Health.

Rassinn

Ekki skal snerta rassinn nema til að þvo hann og þurrka. Endaþarmurinn er þakinn bakteríum sem geta hugsanlega verið skaðlegar heilsunni og því er auðvitað bráðnauðsynlegt að þvo hendurnar vel að lokinni salernisferð.

Augun

Ekki skal snerta augun nema til að setja linsur í þau eða ná aðskotahlutum úr þeim. Annars á ekki að snerta þau og helst ekki láta fingurna koma nærri þeim. Ef bakteríur frá höndunum komast í augun þá getur það valdið augnsýkingu eða jafnvel einhverju verra.

Munnurinn

Niðurstöður breskrar rannsóknar sýna að fólk er með fingur í munninum 23,6 sinnum á klukkustund að meðaltali ef því leiðist í vinnunni. Ef það á annríkt þá gerist þetta 6,3 sinnum á klukkustund. Það er því mikið magn af bakteríum sem fara beint inn í líkamann.

Nefið

Niðurstöður rannsóknar frá 2006 sýna að þeir sem bora í nefið eru 51 prósent líklegri til að fá gula stafýlókokka en þeir sem láta nefið í friði.

Húðin undir nöglunum

Margar hættulegar bakteríur, þar á meðal stafýlókokkar geta hafst við undir nöglunum. Því ættu neglurnar að vera klipptar stuttar til að draga úr líkunum á að bakteríur safnist undir þeim. Það dugir síðan að bursta stuttar neglur öðru hvoru með naglabursta til að fjarlægja bakteríurnar.